La classa de CE2-CM1 se retròba aprèp una setmana de trabalh a distància e doas setmanas de repaus. Gràcias a la classa virtuala mesa a disposicion de la Confederacion de las Calandretas, qu’utiliza un logicial liure, agèrem pas los problèmas de las escòlas que dependián del CNED o autras estructuras. E en esperant las letras dels correspondents de Castras, trabalham a la creacion de poesias ! Siá en creant de vèrses amb rimas, siá, pels mai grands e mai audacioses, en ensajant de seguir la constrenta de la « Sextina ».
Coneissètz pas la sextina ? Es una forma poetica compausada de sièis estròfas de sièis vèrses que lors mots de fin demòran los meteisses tot al long del poèma, dins d’òrdres diferents. S’acaba per una tornada, es a dire 3 vèrses que contenon los sièis mots de rima.
L’invencion d’aquela forma poetica reven al trobador Arnaut Danièl, al sègle XII : èra una forma particulara de « canso ». Foguèt represa per Dante e Petrarca (grands poètas italians dels sègles XIII e XIV) que fixèron lo nom de sextina.
Arnaut Danièl èra ja famós a son epòca, èra un especialista del « trobar clus » es a dire una poesia complèxa e codada, fòrça trabalhada. Agèt una granda influéncia sus la poesia europèa de la fin de l’Edat Mejana e de la Renaissença. Encara uèi, de poètas del mond entièr crèan sextinas.